CCTV5体育导航 - 专业体育赛事直播

唔做二奶大反擊
今午繼續有澳職上演，布里斯班獅吼於主場迎戰墨爾本城。上季慘變「3亞王」嘅墨城，新一季梗係想擺脫二奶命，雖然喺神射手占美麥卡倫助陣下火力依然，但墨城向來攻強守弱，加上近年遇上獅吼經常大手交易，今仗實多波入，2.5球嘅大盤咪走雞。（周二下午4時05分開賽）

墨城上季認真慘情，先喺澳足盃決賽輸畀阿德萊德聯，跟住接連喺常規賽及季後賽屈居FC悉尼之下，連續3項賽事飲恨，今季梗係唔想重蹈覆轍。上季先接掌帥印嘅法國籍教頭莫巴迪斯已經離隊，改由少帥基斯諾保上任，不過呢位前墨城中堅只係做過助教，突然要佢擔大旗經驗點都差少少。好彩墨城今季陣容未有大變，最緊要係有占美麥卡倫壓陣，佢上季力壓FC悉尼王牌方祖榮膺神射手。若果單計常規賽，墨城攻入49粒，係澳職最強火力球隊之一，不過墨城踢法太進取，上季常規賽失咗37粒，係前6名中失波最多球隊之一，預計佢哋今季繼續以攻代守。

近4次交手共轟17球
另一邊廂，獅吼上季喺主帥科拿因疫情劈炮下，雖然臨時上任嘅禾倫穆恩仍帶隊於常規賽取得第4名，可惜喺季後賽首圈即被新軍西部聯淘汰。獅吼今季獲得日本前鋒工藤壯人及中場檀崎龍孔加盟，配合原有嘅史葛麥當奴，相信攻力有增無減。翻查紀錄，雙方近4次碰頭，合共炮製17個士哥，其中3場開出總入球3球或以上，今次捧入球大更上算。